Van twee conincskindren

Het waren twee conincskindren,
Si hadden malkander so lief;
Si konden bi malcander niet komen,
Het water was veel te diep.

Wat deed si? Sy stak op drie keersen,
Als savons het dagelicht sonc:
'Och liefste, comt, swemter over!'
Dat deed sconincs sone, was jonc. 

Dit sach daar een oude quene (vrouw),
Een also vileinich vel;
Sy ghinker dat licht uutblasen,
Daer verdroncker dien jonghen helt.

'Och moeder,' seidese, 'moeder!
Mijn hoofjen  doet mijnder so wee,
Mocht icker een kort half uertje
Spanceren al langhes de zee?'

'Och dochter,' seidese, 'dochter!
Alleen en meucht ghi niet gaen:
Wect op u jongste suster
En later die met u gaen.'

'Mijn alderjonsste suster
Dat is also cleinen kint,
Sy pluct maer al de roosjes
Die si in haer weghen vint.

Sy pluct maer al de roosjens,
En die bladertjens laet si staen:
Dan segghen maer alle die lieden:
Dat hebben conincs kindren ghedaen.'

'Och dochter, seidese, 'dochter!
Alleen meucht ghi daer niet gaen.
Wect op u joncste broeder,
Ende later die met u gaen.'

'Och moeder, mijn joncste broeder
Dat is also cleinen kint,
Hy loopter naer al de voghels,
Die hy in syn weghen vint'

De moeder ghinc nae de kerke,
De dochter ghinc haren ganc,
Tot sy er by twater een visscher,
Haers vaders visscher vant.'

'Och visscher,' seidese, 'visscher,
Mijn vaders visscherkijn!
Woudt ghi een weinich visschen,
Tsoud u wel ghelonet zijn.'

Hy smeet sijn net int water,
De lootjens die ghingen te gront.
Hoe haest was daer gevisschet
Sconincs sone, van jaren was jonc.

Wat troc si van haer hande?
Een vingherlinc (ring) root van gout:
'Hout daer, mijn vaders visscher,
Dees vingherlinc root van gout.'

Sy nam hem in haer armen,
Sy kusten hem voor sijn mont:
'Och mondelingh, kost ghy spreken,
Och hertje, waert ghyder gesont!'

Sy nam hem in haer armen,
Si spronker mee in de see:'
'Adieu, mijn vader en moeder!
Ghi siet mi nemmermee.

Adieu mijn vader en moeder,
Mijn vriendekens alle ghelijc,
Adieu mijn suster en broeder!
Ic vaerder nae themelrijc'

Link : Codex Manesse

TERUG BLOEMLEZING